Saturday, February 24, 2024
Homeஇலக்கியம்அத்தியழல் - 01

அத்தியழல் – 01

(வலியும் நோய் தடமும்)

  • ஷக்தி

நாளை நுகர இயலாமல் கூட போகலாம்

நான், வெஞ்சுடர்
மரபுக்கு புறம்பாக சிவந்ததை பார்க்கிறேன்
என் தலை, அதனுள் அதீத பாரம்
அபரிமித இனம்புரியா வலி
ஒரு பாரிய உடல் உதறல்
இடையீடு செய்யும்படி
சளியும் ரத்தமும் வெளியேறுகிறது
அப்படி நிகழ்ந்ததிலிருந்து,
என் வயிறும் அதன் இடையறா வலியும்
நிஜம் எப்படியிருக்கிறதென்றால்,
உடலை விட மன உளைவு
இனம் புரியா ஆனால் உறுதியான
என் நோவுக்கெதிராய்
எதிர்ப்பு சக்தி உயிருக்காய் போராடுகிறது

உறுதியாய்
அந்த நிர்மல வான் ஒளியை தன் வழியில்
ஒளிர்விக்கிறது
வலப்புற தொண்டைக்குள் எரிவளி
விடுபடும்படி வலி
நான் பிணியாளி.
சட்டென சுவாச வெப்பத்தில் சாகும்
வைரஸ் கற்பனைக்கப்பாற்பட்டு
சுவாச நாளங்களில் நீந்துகின்றன.
விரைவுபடுத்திக் கொண்டு
உடற்தொகுதியை சிதைக்கிறது
தெள்ளத்தெளிவாக சுவாசிக்க முடியவில்லை.
தனித்திருக்கிறேன்
நோவெடுத்தவள்
தவிக்கும் படியான பேரச்சம்

சர்க்கரைக்கு மீந்து நொதித்த
மென்மையான இந்த உடலை
உடல் வெப்பநிலை சீராக்கும் மாத்திரைகள்
உயிரின் வேர்களை
வியர்த்திருக்க வைக்கின்றன
உடலுறுப்புகள் பாழாகாதிருக்க
அறிவுரைகள் சொல்லியும்
பிரஞ்சு ஏகாதியபத்திய
மரண எண்ணிக்கைகளை சொல்லியும்
உயிரின் அணுத்துகளில்
பதட்டம் கூட்டுகிறார்கள்
மலேரிய மாத்திரைகளை
மிரட்டி பறிக்கும்
உலகின் சுழற்சியில்
காலைக்கிளிகளின் சப்தங்களின் ஊடாக
விழிக்கவே செய்கிறேன்

இடுப்பு எலும்புகள் நோக
உடன் நடக்கும் நாய்களும் ஒய்வில்
எழுதும் அறையின்
வெளிவட்ட சுழல் பாதையில்
பூத்திருந்த செம்பருத்திகளுடன்
குரைத்து கொண்டிருக்கிறது
வாசிப்பின் புனித பயணத்தில்
மார்க்ஸின் ‘தத்துவத்தின் வறுமை’
இன்னும் முடிக்காமலிருக்கிறது
கிழிந்த கருப்பு சட்டையை
தைக்க வேண்டும்
இந்த இரவில்

கவனி
நாளை நுகர இயலாது கூட போகலாம்
ஒரே ஒரு நம்பிக்கை
இந்த வாழ்பனுபவங்களோடு
கசந்த ஒருவனை கட்டியெழுப்பிய
பிரித்தறியும் அறிவுடையவன்
சக மனிதர்களே வாழ்வென
வாழ்ந்ததே தெய்வீகமானதெனில்
அவ்வாறானது ஒரு போதும்
மீளாது போகாதென கருதலாம்.

***

‘பிளாசிபோ விளைவு’ (Placebo effect) என்பது மனித வாழ்வுடன் ஆழமான தொடர்புடையதும், அத்தியாவசியதுமாக பலருக்கு நிகழ்வதும் கூட. நோய் சரீர ரீதியிலான உடல் உறுப்புகளில் நிகழும் மாற்றத்தின் அடிப்படையில் மட்டும் வருவதில்லை. உளவியல் ரீதியான காரணங்கள் ஒரு நோயை அப்படியே நோயாக இருக்க வைத்திருப்பதற்கு பதிலாக மனிதனின் அசாத்திய நம்பிக்கைக்கு ஒரு வலு இருப்பதை அவை மெளனமாக சில சமயங்களில் பயன்படுத்தி கொள்கின்றன.


ஒரு இசைக்கலைஞனின் இசையை ரசிக்கும் மனநிலையில் ஒருவன், ஏற்றுக்கொள்ளும் மனநிலையில் ஒருவன், முற்றிலுமாக வெறுக்கக் கூடியதுமான மனநிலையில் மற்றொருவன் என இருப்பதைப் போல இந்த நோய்மைக்கும் காலப்பயிர் போல ஒருவகை விநோதம் நிலவி நிற்பதை இந்த ‘பிளாசிபோ விளைவு’ தெளிவாக்கலில் பார்க்கலாம்.

ஒருவனுக்கு மருத்துவ உதவி தேவைப்படும்படியான காய்ச்சலுக்கான தீர்வாக இரண்டு வாய்ப்புகள் இருக்கிறது
ஒன்று; ஒரு பாராசிட்டாமல் உதவியுடன் இருந்து விடுவதென அவன் விரும்புதல். இரண்டு; ஒரு மருத்துவரின் அறிவுரை அல்லது மருத்துவ உதவியுடன் தான் மீள முடியுமென்ற சூழல்.


இதில்தான் உறுத்தலற்ற மனஈர்ப்பு என்ற ஒன்று இருக்கிறது.
நமக்கான மருத்துவம் ஒன்றுதான். ஆனால் இதில் அவசியமான நமது தேர்வு என்ற ஒன்று இருக்கிறது. நமக்கான ராசியான மருத்துவர், சமயங்களில் மருத்துவமனையும் இருக்கிறது. மருந்து சந்தையில் பதினேழு வகையான ஒரே நிறை கொண்ட காய்ச்சல் மாத்திரைகள் உண்டு. ஒவ்வொருவருக்கும் ஒன்றைத் தவிர்த்த மற்றொன்றின் மீது விமர்சனமும் உண்டு. விரும்பும் பெயர் கொண்ட மாத்திரையை தவிர மற்றொன்றின் மீது கடும் விமர்சனம் வைக்கிறவர்களும் உண்டு. வலி நீக்கிகளில் கூட பிடித்தமானதையே பரிந்துரைக்கும்படி கேட்கும் நோயாளிகளை பார்த்திருக்கிறேன்.

எப்பொழுதும் உடன் மாத்திரைகளை வைத்திருப்பவர்களும் உண்டு,
ஒரு விபத்தால் ஆழமான பயத்திற்க்கு உட்பட்டவருக்கு சீரான இரத்த ஒட்ட, மன இலகுவாதல் இரண்டுக்கும் அத்தியாவசியதுமான மருந்துகளை எடுத்துகொள்வதன் மீது உவப்பற்று ஒரு தாயத்து கட்டிக்கொள்பவரை பார்க்கிறோம். வாரம் முழுவதும் காய்ச்சலில் கிடந்தவன் கோவிலுக்கு வேண்டிக் கொண்டதால் குணமாகுவதும் அப்படி ஒருவகை தான்.


சிலருக்கு ஒரு ஊசி அவசியம். நோய் வாய்ப்பட்டதும் அந்த ஊசி போடும் தருணத்தின் மீது காதல் உருவாகிவிடும். காய்ச்சல் வந்தாலும் வரலாம் என கிராமங்களில் ஊசி போட வருவதுமுண்டு. இதை ஒருவகை சிக்கலான, இல்லை இல்லை அதீதவகைக் காதல் எனலாம். இவ்வகை குணமாதலை தான் மருத்துவம் ‘மருந்துப்போலி விளைவு’ (Placebo effect) என்கிறது.


ஒரு நோயிலிருந்து மீள மருந்துகள் மற்றும் மருத்துவர்களை விட நம் மனம்தான் பெரும்பங்காற்றுகிறதென்பது அடிப்படை உண்மை. மனிதன் தன் நம்பிக்கைக்கு அசாத்திய வலு இருப்பதை உணர்ந்திருப்பதன் மூலம் ‘பிளாசிபோ விளைவு’ சாத்தியமாகிறது.
எந்த இயக்கத் திறனுமற்ற மருந்துகளால் உயிர்த்துடிப்புள்ள இந்த பிரபஞ்சத்தில் கணிசமானோர் குனமாகிறார்கள். இதில் தவறான அல்லது பொய்யாக லாப நோக்கில் தரப்படும் மருந்துகள் என்றெல்லாம் எதுவும் இல்லை அதேசமயம் மருந்துப்போலி விளைவென்பது குருட்டடியாக ஏற்படும் தாக்கமும் கிடையாது. சிக்கலான மோசடியோ அல்லது தந்திரமுமல்ல.
மருத்துவ குணம் இல்லாத மருந்தை போன்ற ஒன்றை எடுத்துக் கொண்டதும் இந்த மருந்தே எல்லாவற்றையும் சரிசெய்து விடும் என்கிற நம்பிக்கையால் ஏற்ப்படும் தாக்கமானது மூளைக்குள் ஒருவித வேதியியல் மாற்றத்தை உண்டாக்கி விடுகின்றது. ‘பிளாசிபோ விளைவு’ உண்டாவதற்கு ஒருவன் நோய் பீடிப்புக்கு உள்ளாக வேண்டிய அவசியமெதுவும் இல்லை.


ஆல்கஹால், தூக்கமூட்ட எடுத்துக்கொள்ளும் மாத்திரைகள் போன்றவை எடுத்துக் கொள்கிறவருக்கு அவை எதிர்பார்க்கும் தாக்கத்தை ஏற்ப்படுத்தலாம். கலப்பட மதுபானங்களின் மீது அதிகரிக்கும் ஈர்ப்புக்கும், அதைப் பருகியவர் போதை அடைவதும் இந்த ‘மருந்துப்போலி’ விளைவால் தான்.


ஒவ்வொரு வினைக்கும் எதிர் வினை இருப்பதைப் போல மருந்துப்போலி விளைவுக்கும் ஒரு எதிர் விளைவு உண்டு.
எந்த மருந்தை உட்கொண்டாலும் சிலருக்கு பக்க விளைவாக தலைசுற்று, தலைவலி அல்லது வாந்தி போன்றவை ஏற்ப்படுவதுண்டு இது நொசீபோ விளைவு (Nosebo effect) எனப்படுகிறது.

  • ஷக்தி – மருத்துவத்துறையில் பணியாற்றி வரும் ஷக்தி, துறை சார்ந்த கவிதைகள் வாயிலாக அறியப்பட்டவர். மூன்று கவிதைத்தொகுப்புகள் ஒரு நாவல் என இதுவரை வெளிவந்துள்ளன. தொடர்புக்கு – [email protected]

Previous article
Next article
RELATED ARTICLES

1 COMMENT

LEAVE A REPLY

Please enter your comment!
Please enter your name here

Most Popular