T.கண்ணன் கவிதைகள்

0

பறந்து  சென்ற  பறவைகள்  இன்னும்  திரும்பவில்லை
காத்திருந்தது  கனவு
புரண்டு  புரண்டு  படுத்தது  விழிப்பு
விடியக்  காத்திருந்தது  இருள்
கனவு  மூடக்  காத்திருந்தது  விடியல்
இருள்  அந்தியின்  தத்தளிப்பு
நரை  வானத்தில்  உற்சாகமாய்
சிலம்பிக்  கொண்டிருந்தன
பறவைகள்

***

ஓடாத  கைக்கடியாரத்தை
அறிந்தே  பரிசாய்  அளித்து  விட்டுச்  சென்றான்
நண்பன்  சாயல்  கொண்ட  நண்பன்
வெகு  காலத்திற்கு  பிறகு
அது  துடிக்கத்  தொடங்கியது
அந்த  நண்பன்  இறந்து  விட்டதாய்
நான்  அனுமானித்துக்  கொண்டேன்
ஆம் …
அவன்  இறந்துதான்  விட்டான்

***

தென்னங்கீற்றீல்  ஆடிக்  கொண்டிருந்தது  கிளி
அவன்  மனம்  கொண்ட  வில்லால்
அதனைக்  அடித்துக்  கொண்டிருந்தான்
தப்பிப்  பறக்கவில்லை
அதே  இடத்தில்  அமர்ந்து  கொண்டிருந்தது  கிளி
அம்புகள்தான்  விலகி  விலகிச் சென்று  கொண்டிருந்தன

***

அப்பா  கிணற்றில்  தண்ணீர்
இரைத்துக்  கொண்டிருந்தார்
தேங்காய்  துருவிக்  கொண்டிருந்தது  ஒரு குழந்தை
வாசலை  பெருக்கிக்  கொண்டிருந்தது  இன்னொன்று
விளக்கை  தேய்த்துக்  கொண்டிருந்தாள்  அக்கா
அவரைக்காய்  ஆய்ந்து  கொண்டிருந்தது  கடைக்குட்டி
அவர்கள்  அம்மாவிற்கு
இன்று   சுபம்

***

T.கண்ணன், பிரம்மாக்ஷஸ் சிற்றிதழை நடத்தியவர். ஸ்ரீரங்கத்தில் வசித்துவருகிறார். “என் நினைவிற்கும் உன் மறதிக்கும்” கவிதைத் தொகுப்பு 2019ல் வெளியானது, “கல்வெட்டுச் சோழன்” எனும் இவரது சிறுகதைத் தொகுப்பும் அண்மையில் மறுபதிப்பு கண்டது

LEAVE A REPLY

Please enter your comment!
Please enter your name here